ទាក់ទងនឹងបញ្ហានេះលោក អឿន សុផល អ្នកជំនាញថែទាំសេះនៅទីលាន SCT Sport Complex បានប្រាប់ថា៖ «ការគ្មានសេះពូល A ប្រកួតនៅថ្ងៃនេះ ដោយសារសេះរបស់យើងទុកសម្រាប់ប្រកួតផ្តាច់ព្រ័ត្រដណ្តើមប្រាក់ ២៥ ០០០ ដុល្លារនៅខែ ១២ អ៊ីចឹងខាងខ្ញុំតម្រូវឲ្យមានការបំពាក់បំប៉នសេះពូល A នេះចាប់ពីខែ ១០ និងខែ ១១ ហើយយើងត្រូវប្រកួតនៅខែ ១២ ខណៈការប្រកួតដណ្តើមយកពានធំ និងប្រាក់ ២៥០០០ ដុល្លារនេះ ក៏មានសេះមកពីប្រទេសជិតខាង ចូលរួមប្រកួតផងដែរ»។
លោកបន្ថែមថា៖ «ការប្រកួតផ្តាច់ព្រ័ត្រ ប្រចាំឆ្នាំ ២០១៧ នៅខែ ១២ នោះ មានសេះពីប្រទេសថៃ និងវៀតណាម មកប្រកួតដណ្តើមប្រាក់ ២៥០០០ ដុល្លារជាមួយសេះនៅក្នុងកសិដ្ឋានរបស់យើងផ្ទាល់ ដោយយើងតម្រូវឲ្យមានតែ ១៦ ក្បាលទេ ប៉ុន្តែចំពោះចំនួនសេះមកពីប្រទេសជិតខាង យើងនៅមិនទាន់ដឹងច្បាស់ទេ ឯខាងយើង បានត្រៀមសេះចំនួន ១២ ក្បាល សម្រាប់ត្រៀមការប្រកួតដណ្តើមយកពានធំនោះ»។
បើទោះបីជា សេះក្រុម A មិនត្រូវដាក់ឲ្យប្រកួតប្រចាំខែតុលានេះ ប៉ុន្តែគណៈកម្មការបានរៀបចំឲ្យមានការប្រកួតរវាងសេះក្នុងស្រុក ឈរនៅពូល D និងពូល E ដែលមានសេះសរុបចំនួន ៤១ ក្បាល ដោយមានការគាំទ្រខ្លាំងដូចការប្រកួត ប្រចាំខែកន្លងមកដែរ ព្រោះការប្រកួតរវាងសេះក្នុងស្រុកនេះ ក៏នឹងត្រូវជ្រើសរើសសេះល្អៗ យកទៅប្រកួតផ្តាច់ព្រ័ត្រប្រចាំឆ្នាំ ២០១៧ តាមពូលនីមួយៗ យកពានតូច អមជាមួយការប្រកួតយកពានធំប្រចាំពូល A នៅខែធ្នូ ផងដែរ៕
