«​មានទ្រព្យ​» តែ​ខ្វះ​ចំណេះ ខ្វះ​សីលធម៌ និង​ខ្វះ​គុណធម៌ នាំ​ឲ្យ​ខ្វះ​ការគោរព​

​នៅក្នុង​សង្គម​ ណាក៏ដោយ មិន​ថា នៅក្នុង​សង្គម​ស៊ី​វិ​ល័យ​ជឿនលឿន ឬ​សង្គម​មិនសូវ​ស៊ី​វិ​ល័យ អ្នកមាន​ទ្រព្យសម្បត្តិ​លុយកាក់​តែងតែ​ត្រូវបាន​សង្គម​ឲ្យ​តម្លៃ​ជាង​ អ្នកមាន​ចំណេះ សីលធម៌ និង​គុណធម៌​។ នេះ​ប្រសិនបើ​គេ​ក្រឡេកមើល​មួយ​ភ្លែត​។ តែ​ប្រសិនបើ​គេ​ពិនិត្យ​ឲ្យ​ច្បាស់ និង​ឲ្យ​ស៊ីជម្រៅ​បន្តិច បើ​បុគ្គល​ម្នាក់​មានទ្រព្យ​ច្រើន​ហូរហៀរ តែ​ខ្វះ​ចំណេះ ខ្វះ​សីលធម៌ និង​ខ្វះ​គុណធម៌ បុគ្គល​រូបនោះ ក៏​មិន​ទទួលបាន​ការគោរព​ពី​មជ្ឈដ្ឋាន​ច្រើន​ដែរ​។ ផ្ទុយទៅវិញ មហាជន​អាច​គោរព​តែ​នៅ​ចំពោះមុខ តែ​ក្រោយខ្នង ពួកគេ​នាំគ្នា​និយាយដើម​។ដូច្នេះ ប្រសិនបើ​លោកអ្នក មានទ្រព្យ​ហើយ ហើយ​ចង់​ឲ្យ​មហាជន​ស្រឡាញ់​រាប់អាន និង គោរព​លោកអ្នក​ដោយស្មោះ​ចេញពី​បេះដូង លោកអ្នក​ត្រូវមាន​ចំណេះ ត្រូវមាន​សីលធម៌​ខ្ពស់ និង​ត្រូវមាន​គុណធម៌​៕
​